اس موقع پر سرکاری و سماجی شخصیات کی بڑی تعداد بھی موجود تھی، جبکہ یہ جشنوارہ صحنِ حضرت فاطمہ سلام اللہ علیہا میں دو روز تک جاری رہے گا۔
شرکاء شعراء نے اس ادبی اجتماع میں شرکت پر مسرت اور فخر کا اظہار کرتے ہوئے کہا کہ یہ جشنوارہ ایک ایسا ثقافتی پلیٹ فارم ہے۔
جہاں امت کے شعراء عربی زبان کے ذریعے رسولِ اکرم صلی اللہ علیہ وآلہ وسلم کی محبت اور آپؐ سے وفاداری کے جذبے کے تحت ایک جگہ جمع ہوتے ہیں۔
نجف اشرف سے تعلق رکھنے والے شاعر ڈاکٹر مہند جمال الدین نے کہا:
’’حرم مقدس امیرالمومنین علیہ السلام کی جانب سے رسولِ اکرم صلی اللہ علیہ وآلہ وسلم کی ولادتِ باسعادت کا جشن منانا کوئی تعجب کی بات نہیں۔‘‘
انہوں نے مزید کہا:
’’شہرِ رسول میں داخل ہونے کا راستہ امیرالمومنین حضرت علی بن ابی طالب علیہ السلام کے دروازے سے ہے۔‘‘
انہوں نے مزید کہا:
’’اس مناسبت کو پورے ایک ہفتے تک منانا امت کی توجہ اس کے ثقافتی اور فکری کردار و ذمہ داری کی جانب مبذول کراتا ہے۔‘‘
انہوں نے اس بات پر زور دیا کہ شعر کو امت کے مسائل اور اسلامی قضایا کی ترجمانی کرنی چاہیے اور ثقافتی چیلنجز کا مقابلہ کرنے میں اپنا کردار ادا کرنا چاہیے۔
ان کے مطابق نجف اشرف اس اہم ثقافتی مقام کی میزبانی کے لیے سب سے زیادہ موزوں شہروں میں سے ہے۔
مصر سے تعلق رکھنے والے شاعر ضیاء کیلانی نے اس اجتماع میں شرکت کو رسولِ اعظم صلی اللہ علیہ وآلہ وسلم سے محبت اور وفاداری کے اظہار کا ایک موقع قرار دیا۔
انہوں نے کہا کہ حرم مقدس امیرالمومنین علیہ السلام اور مرقدِ امیرالمومنین علیہ السلام کے جوار میں اس جشنوارے کا انعقاد اس مناسبت کو مزید خصوصی اور خوبصورت بنا دیتا ہے۔
کیلانی نے شعراء کی اس خواہش کا اظہار کیا کہ وہ اس ثقافتی و روحانی منظرنامے میں اپنا حصہ ڈالیں، خواہ ایک ایسے شعر یا کلمے ہی کے ذریعے کیوں نہ ہو جو ان کی محبت اور اس بابرکت مناسبت سے ان کی وابستگی کی ترجمانی کرے۔
سلطنتِ عمان سے تعلق رکھنے والے شاعر ناصر الغسانی نے جشنوارے میں شرکت پر خوشی کا اظہار کرتے ہوئے حرم مقدس امیرالمومنین علیہ السلام کا اس ادبی اجتماع کے انعقاد پر شکریہ ادا کیا۔ انہوں نے کہا کہ یہ شرکت ان کے شعری سفر میں ایک اہم اور یادگار سنگِ میل کی حیثیت رکھے گی۔
انہوں نے مزید کہا کہ عربی زبان مختلف اقوام کے درمیان رابطے کا ایک پل ہے۔
انہوں نے عراقی عوام کی جانب سے ملنے والی محبت، سخاوت اور پرتپاک استقبال پر بھی خوشی کا اظہار کیا۔
مملکتِ مراکش سے تعلق رکھنے والے شاعر نوفل السعیدی نے جشنوارے میں شرکت کو اپنے دو بڑے خوابوں کی تعبیر قرار دیا۔
ان میں پہلا خواب عراق کی زیارت اور یہاں اپنے اشعار پیش کرنا تھا، جبکہ دوسرا حرم مقدس امیرالمومنین علیہ السلام کی بارگاہ میں حاضری اور امیرالمومنین حضرت علی بن ابی طالب علیہ السلام کی بارگاہ میں اپنی نظم پیش کرنا تھا۔
السعیدی نے کہا کہ یہ لمحات کسی بھی شاعر کی زندگی میں ناقابلِ فراموش سنگِ میل کی حیثیت رکھتے ہیں۔
انہوں نے مزید کہا کہ شعراء سرزمینِ نجف اشرف سے دنیا بھر کی اقوام کے لیے محبت اور امن کا پیغام لے کر واپس جائیں گے۔
لیبیا سے تعلق رکھنے والے شاعر احمد الفاخوری نے بھی جشنوارے میں شرکت پر فخر کا اظہار کیا۔
انہوں نے کہا کہ نجف اشرف میں حاضری بذاتِ خود ایک عظیم اعزاز ہے، بالخصوص ایسے موقع پر جب عرب اور عراقی شعراء کی ممتاز شخصیات بھی ساتھ موجود ہوں۔
انہوں نے مزید کہا کہ یہ جشنوارہ ایک غیر معمولی موقع ہے، کیونکہ عراق شعر و شعراء کی سرزمین ہے۔
ان کے مطابق عرب شاعر کو یہاں تخلیقی اظہار کے لیے ایک حقیقی اور مستند ماحول میسر آتا ہے، کیونکہ اس سرزمین میں ادبی، ثقافتی اور تاریخی گہرائی کے بے شمار خزانے موجود ہیں۔
پانچویں بین الاقوامی عربی شعری جشنوارۂ پیامبرِ اعظم صلی اللہ علیہ وآلہ وسلم کی سرگرمیاں دوسرے روز بھی عراق، عرب ممالک اور عالمِ اسلام سے تعلق رکھنے والے ممتاز شعراء کی شرکت کے ساتھ جاری ہیں۔
یہ ادبی و ثقافتی اجتماع نجف اشرف کی علمی، ثقافتی اور ادبی مرکز کی حیثیت کو اجاگر کرتا ہے، جو امت کی آوازوں کو اپنے دامن میں جگہ دینے اور اس کے مسائل و احساسات کی ترجمانی کرنے والا ایک اہم منبر ہے۔
