حرمِ مقدسکے کلیدی معمارانہ و ہندسی خصائص
گنبدِ علوی اور میناروں کا بے نظیر تناسب
حرمِ مقدس کے موجودہ معمارانہ خصائص میں سب سے نمایاں وصف اس کا پیازی شکل کا گنبد ہے، جس کی بلندی صحنِ علویِ شریف کے فرش سے لے کر عمارت کے آخری سرے (رأس) تک ۳۰ میٹر ہے۔ یہ گنبدِ نورانی نہ صرف اس پورے مجمعے کا بصری مرکز ہے، بلکہ پوری عمارت کے لیے ہندسی و معمارانہ توازن کا نقطۂ ثقل بھی شمار ہوتا ہے۔
جو چیز اس عمارتِ مقدس کو ائمہ معصومین (علیہمالسلام) کے دیگر مراقدِ مطہرہ سے متمایز کرتی ہے، وہ گنبد اور میناروں کے مابین بلندی کا تفاوت ہے؛ اس طور پر کہ دونوں میناروں میں سے ہر ایک مینار، گنبد سے ۱.۵ میٹر چھوٹا ہے۔ عمارت کے آخری سرے تک ہر مینار کی بلندی ۲۸.۵۰ میٹر شمار کی گئی ہے اور یہ خاص تناسب، تمام مقاماتِ مقدسہ میں بے نظیر اور صرف حرم مقدس امیرالمومنین (علیہالسلام) سے ہی مخصوص ہے۔
حرم کے بیرونی رخ کے تناسبات میں پوشیدہ ہندسی اسرار
گنبد اور میناروں کی بلندی کے یہ تناسبات، دقیق ہندسی محاسبات کی بنیاد پر اور حرم کے بیرونی رخ (نمائے حرم) میں باہم متداخل مخمس (پانج ضلعی اشکال) کے ایک نیٹ ورک میں موجود مرجعی نقاط سے استفادہ کرتے ہوئے متعین کیے گئے ہیں۔ مثال کے طور پر، اگر ایک مخمسِ منتظم ترسیم کیا جائے اور اس کے دو اضلاع کا نقطۂ تقاطع ایوانِ طلا (سنہری ایوان) کے وسط پر منطبق ہو، تو یہ ہندسی ساخت دونوں میناروں کو اپنے احاطے میں لے لیتی ہے اور اس کا بالائی ضلع بعینہٖ گنبد کے شعاعی تاج پر منطبق ہو جاتا ہے۔
اس ترتیب کے مطابق، گنبد یا میناروں کی موجودہ بلندی میں ذرا سی تبدیلی بھی اس پوشیدہ مخمسی تناسب کے بکھر جانے کا سبب بنے گی؛ یہ امر بذاتِ خود اس عمارتِ مقدس کے فنِ تعمیر میں علمِ ہندسہ کے بے مثال عجائبات اور معجزات کا ایک شاندار مظہر ہے۔
یہ کہنا بے جا نہ ہوگا کہ روضۂ حیدری کے فنِ تعمیر میں جو اسرارِ نہفتہ اور بلند و ژرف معانی ودیعت کیے گئے ہیں، ان کا ادراک علم و فضل میں روزگار کے کم نظیر نوابغ ہی کر سکتے ہیں؛ اور بلا شبہ وہ یگانہ روزگار شخصیت، عالمِ ربانی اور عارفِ الٰہی، شیخ بہائی (رضوان اللہ علیہ) کی ذاتِ گرامی تھی۔
دیگر عتبات کے برعکس ایک متمایز داخلی رخ
اس معمارانہ اسلوب کی ایک اہم خصوصیت یہ ہے کہ حرمِ شریفِ علوی کا مرکزی راستہ (داخلی دروازہ) مشرق کی جانب ایوانِ طلا میں واقع ہے؛ یعنی حضرت امیرالمومنین (علیہالسلام) کے پائینتی (پاؤں کی جانب) سے۔ جب کہ ائمہ معصومین (علیہمالسلام) کے دیگر اکثر بقاعِ متبرکہ میں مرکزی دروازہ جنوب کی سمت یعنی قبلہ رخ تعبیہ کیا گیا ہے؛ یہ وہ رخ ہے جہاں سے زائر داخل ہوتے وقت حضرت کے سرِ مبارک کی جانب قرار پاتا ہے۔
لیکن حرمِ مقدس کے نقشے میں، قدموں کی سمت سے راستے کا انتخاب کاملاً شعوری اور ہدف مند تھا؛ کیونکہ یہ اسلوب، مولائے کائنات حضرت علی بن ابیطالب (علیہالسلام) کی بارگاہ میں غایت درجے کے خضوع، ادب اور فروتنی کی ایک واضح علامت شمار ہوتا ہے۔ اسی لیے، ایسا نظر آتا ہے کہ روضۂ حیدری کے اصل معمارانہ نقشے میں، مغرب کی سمت یعنی امام کے سرِ مبارک کی جانب صحنِ شریف کے مرکزی دروازے کا نہ ہونا، دقیقاً اسی روحانی فلسفے اور معنی کے مرہونِ منت ہے۔
شعاعِ آفتاب کے زاویے کا انتخاب
اس کے علاوہ، گنبدِ نورانی پر سورج کی شعاعوں کے زاویۂ تابش کی تنظیم صرف اسی صورت میں ممکن تھی جب حرم کا بڑا ایوان مشرق کی سمت واقع ہو۔ یہ انتخاب، اپنے فنی اور ہندسی فوائد کے علاوہ ایک علامتی اور رمزی پیغام کا حامل بھی ہے۔
کسی بھی نکتہ سنج محقق پر یہ مخفی نہیں ہے کہ مادی پہلو یعنی طلوعِ آفتاب اور اعتقادی پہلو یعنی یہ حقیقت کہ امیرالمومنین (علیہالسلام) "نورِ خدا” ہیں کے مابین یہ ہم آہنگی ایک انتہائی عمیق، رمزی اور منفرد معنی رکھتی ہے۔ یہ علامتی ربط ایک ایسا روحانی اور گہرا اشارہ ہے جسے یقیناً شیخ بہائی نے مکتبِ تشیع کے اعتقادی معارف اور محبتِ اهلِ بیت (علیہمالسلام) کے بحرِ بیکراں سے الہام پا کر اس مقدس عمارت کے کالبدِ تعمیر میں متجلی کیا ہے۔
فنِ تعمیر میں فضائی ساخت اور ماحولیاتی تدابیر
حرمِ مقدس، صحنِ شریفِ حیدری کے وسط میں واقع ہے۔ یہ صحن چوکور (مربع) شکل کا ہے اور تین حصوں یا چھوٹے صحنوں (مشرقی، شمالی اور جنوبی) میں منقسم ہے۔ یہ وسیع و عریض صحن ایک بلند دیوار کے احاطے میں ہے جس کے اندر دو طبقات (منزلوں) پر مشتمل حجروں کا ایک منظم مجموعہ قائم ہے۔
ہر حجرے کے اوپر ایک ایوان (نشیمن) بنایا گیا ہے اور ان ایوانوں کی کل تعداد ۹۹ تک پہنچتی ہے؛ یہ وہ عدد ہے جو بظاہر ایک رمزی و علامتی دلالت کے تحت "اسمائے حسنیٰ” کی طرف ایک لطیف اشارہ ہے، جو اس فضا کے معنوی پہلو کو دوچند کر دیتا ہے۔
اوپری منزل تک رسائی کے راستے
زمینی منزل اور بالائی منزل کے مابین رابطہ پانچ لہر دار یا چکر دار زینوں کے ذریعے قائم ہوتا ہے؛ اس طرح کہ دو زینے شمالی سمت میں، دو زینے جنوبی سمت میں اور ایک زینا صحن کے مشرقی ضلع میں تعبیہ کیا گیا ہے۔ یہ نپی تلی اور حساب شدہ ترتیب، اپنے عملی فائدے کے علاوہ، صحن میں زائرین کی آمد و رفت اور انسانی بہاؤ کی متوازن تقسیم میں مددگار ثابت ہوتی ہے۔
ماحولیاتی تدابیر اور موسمیاتی بنیادی ڈھانچہ
روضۂ مقدسِ کے اس بے مثال فنِ تعمیر میں مختلف قسم کے "ماحولیاتی پہلوؤں” بشمول فرش کی آخری تہہ بچھانے سے پہلے زمین کی بنیادوں کی مرمت اور تیاری کا اطلاق واضح طور پر دیکھا جا سکتا ہے۔ یہ ہوشمندانہ تدابیر تعمیراتی مصالح کے انتخاب اور عمارت کی ساخت کے طریقہ کار، دونوں میں جلوہ گر ہیں۔
ان اقدامات کا بنیادی مقصد اس عمارت کو شہرِ نجف کے سخت موسمی حالات، بالخصوص شدید گرمی اور گرد و غبار کے پے در پے آنے والے طوفانوں کے ساتھ کاملاً سازگار بنانا تھا۔ معمارانہ اسلوب کا یہ طریقہ، جسے دورِ حاضر کی اصطلاح میں "پائیدار فنِ تعمیر”کہا جاتا ہے، توانائی کی بچت، اندرونی ماحول کے معیار میں بہتری، فضا کے تحفظ اور زائرین کے لیے طویل المدتی و پائیدار آسائش کی فراہمی جیسے اصولوں کا مقتضی ہے۔
مقامی مصالح کا استعمال اور موسم کا حکیمانہ جواب
اس عمارت کی تعمیر میں خطے میں دستیاب قدرتی مصالح مثلاً پکی ہوئی اینٹوں (سوراخ دار طابوق)، گچ (جپسم) اور لکڑی سے استفادہ کیا گیا ہے۔ عریض و ضخیم دیواریں اور گنبدی شکل کے حجرے جو بادگیروں (ہوا کی آمد و رفت کو قابو کرنے والے نظام) سے لیس ہیں، باہم مل کر ایک مؤثر انسدادِ حرارت اور قدرتی نظامِ تہویہ کا کردار ادا کرتے ہیں؛ یہ ایک ایسا کارآمد نمونہ ہے جس کی مثالیں قدیم شہروں کے روایتی طرزِ تعمیر میں کثرت سے ملتی ہیں۔
حرم کی عمارت میں روشنی اور ہواداری کے پوشیدہ نظام
خود حرمِ مطہرِ کی عمارت کے اندر بھی کاملاً نپی تلی اور حکیمانہ ڈیزائنگ کی گئی ہے؛ منجملہ اندرونی اور بیرونی گنبدوں کے مابین ایک وسیع فضا کی موجودگی، کھڑکیوں کی تنصیب کا دقیق محلِ وقوع، اور حرم کی چھت کے نیچے راہداریوں کا ایک ایسا نیٹ ورک جو چھت کی سطح سے ہواداری کے مخصوص سوراخوں کے ذریعے دیکھا جا سکتا ہے۔
تدابیر کا یہ مجموعہ توانائی کی بچت کے لیے ایک انتہائی کارآمد نظام کی شکل اختیار کر چکا ہے؛ ایک ایسا نظام جو بہ یک وقت حرارتی تحفظ فراہم کرتا ہے، مطلوبہ ہواداری کا انتظام کرتا ہے اور قدرتی روشنی کو متوازن اور بہترین انداز میں اندرونی فضاؤں کی طرف گامزن کرتا ہے۔
مآخذ
کتاب تاریخ المرقد العلوی المطهر سے ماخوذ
