تاجِ سرِ سُخن ہے شہِ لافتا کی مدح / حُسنِ رُخِ کلام ہے مشکل کُشا کی مدح / لفظوں کا نور ہے اسدِ کبریا کی مدح / خلعت ہے حرف حرف کا دستِ خدا کی مدح /
جب تک زباں رہے صفتِ مرتضا کرے / بلبل وہ خوشنوا ہے جو گُل کی ثنا کرے /
ہے جادۂ بہشتِ بریں مرتضیٰؑ کی مدح / شمعِ رہِ نجات ہے شیرِ خدا کی مدح / مفتاحِ بابِ خلد ہے خیبر کُشا کی مدح / کافی ہے مغفرت کو شہِ قل کفا کی مدح /
اہلِ ولا ہے گر تو ثنائے ولیؑ کرے / اعلیٰ وہی زباں ہے جو ذکرِ علیؑ کرے/
حیراں ہے عقل و فہم کہوں گر تو کیا کہوں / تشبیہ مبتذل ہے جو شمس الضحیٰ کہوں / داخل نصیریوں میں کریں گر خدا کہوں / لیکن مجال کیا جو خدا سے جُدا کہوں /
توصیفِ ذاتِ پاک، مجالِ بشر نہیں / وہ کیا ثنا کرے جسے اپنی خبر نہیں /
میر انیس
