مختلف مقامات پر خدمات
تقریباً ۵۰۰ رضاکار خواتین حرم مقدس اميرالمومنين عليہ السلام کے مختلف خدماتی مراکز اور حرم کے اطراف میں اپنی ذمہ داریاں انجام دے رہی ہیں۔ ان کی ذمہ داریوں میں زائرات کی رہنمائی، داخلے اور اخراج کو منظم بنانا، اور بڑھتے ہوئے ہجوم کے دوران انتظامی امور میں معاونت شامل ہے۔
چوبیس گھنٹے خدمات
رضاکار خواتین ۲۴گھنٹے مختلف شفٹوں میں خدمات انجام دے رہی ہیں، تاکہ ہر وقت زائرات کو سہولیات میسر رہیں۔ ان کی کارکردگی کی نگرانی رضاکار مرکز اور متعلقہ نگران عملہ مسلسل کر رہا ہے، تاکہ خدمات کا معیار برقرار رہے۔
رضاکار خواتین کے لیے مکمل سہولیات
شعبۂ امورِ نسواں کی سربراہ، خادمہ رملہ الخزاعی نے نیوز سینٹر سے گفتگو کرتے ہوئے کہا:
"رضاکار خواتین اربعین کے خدماتی منصوبے کا ایک اہم حصہ ہیں۔ وہ زائرات کی خدمت اور انتظامی امور میں مؤثر کردار ادا کر رہی ہیں۔”
انہوں نے مزید بتایا:
"حرم مقدس اميرالمومنين عليہ السلام نے رضاکار خواتین کے لیے رہائش، آرام، کھانے، طبی سہولیات اور آمد و رفت کا مکمل انتظام کیا ہے، تاکہ وہ پوری توجہ اور بہترین انداز میں اپنی ذمہ داریاں انجام دے سکیں۔”
نمایاں خدمات پر اعزازات
رملہ الخزاعی نے بتایا کہ رضاکار خواتین اور رضاکار اداروں کی بہترین کارکردگی کا جائزہ لینے کے لیے ایک خصوصی پروگرام بھی ترتیب دیا گیا ہے، جس کا مقصد خدمت کے جذبے کو فروغ دینا اور نمایاں کارکردگی دکھانے والوں کی حوصلہ افزائی کرنا ہے۔
اسی سلسلے میں ایک نمایاں رضاکار ادارے اور متعدد ممتاز رضاکار خواتین کو اعزازات سے نوازا گیا، جبکہ اربعین کے خدماتی سیزن کے اختتام پر حرم مقدس اميرالمومنين عليہ السلام کی جنرل سیکرٹریٹ کی جانب سے تمام شریک رضاکار اداروں کی خدمات کے اعتراف میں خصوصی تقریب بھی منعقد کی جائے گی۔
