میلے کے انتظامی سربراہ خادم جعفر البدیری نے نیوز سینٹر سے گفتگو کرتے ہوئے بتایا کہ متعلقہ شعبوں کے باہمی تعاون اور رابطہ کاری سے میلے کی تمام تیاریاں مکمل کرلی گئی ہیں۔ انہوں نے کہا کہ پروگرام میں مختلف ادبی اور فنی سرگرمیاں شامل ہیں، جن میں شعری کلام کی پیشکش، تمثیلی مناظر، بصری مواد کی نمائش اور نجف اشرف کی شعری تاریخ کے مختلف ادوار اور اہم مراحل کا تعارف شامل ہے۔
انہوں نے مزید بتایا کہ عراق اور آٹھ عرب و اسلامی ممالک سے آنے والے شعراء اور مہمانوں کے لیے خصوصی ثقافتی اور ضیافتی پروگرام بھی ترتیب دیا گیا ہے، جس کے ذریعے شعراء، ادباء، ناقدین اور ثقافتی امور سے وابستہ افراد کو باہمی ملاقات، تبادلۂ خیال اور فکری و ادبی رابطے کا موقع فراہم کیا جائے گا۔ انہوں نے کہا کہ یہ میلہ سیرتِ نبوی اور اسلامی اقدار سے وابستہ شعری تخلیقات کو اجاگر کرنے کے لیے ایک مؤثر پلیٹ فارم کی حیثیت رکھتا ہے۔
جعفر البدیری نے وضاحت کی کہ اس میلے کا بنیادی مقصد شعر و ادب اور فنونِ لطیفہ کے ذریعے سیرتِ نبوی سے وابستگی کو مزید مضبوط کرنا، شعراء، ادباء اور ناقدین کو یکجا کرنا، نوجوان شعراء کی حوصلہ افزائی کرنا اور نجف اشرف کے ادبی مقام اور اس کی قدیم شعری روایت کو نمایاں کرنا ہے۔ اس کے ساتھ ساتھ یہ میلہ حرم مقدس امیرالمومنین علیہ السلام کی ثقافتی سرگرمیوں کو مزید وسعت دینے اور سرکاری، سماجی و جامعاتی ادبی و ثقافتی اداروں کے ساتھ مؤثر روابط قائم کرنے میں بھی اہم کردار ادا کرے گا۔
اس بین الاقوامی شعری میلے کے انعقاد کے لیے حرم مقدس امیرالمومنین علیہ السلام کے شعبۂ اعلام، مرکزِ نظم برائے منصوبہ بندی و ترقی، شعبۂ فکری و ثقافتی امور اور شعبۂ تعلقاتِ عامہ کے درمیان باہمی تعاون اور رابطہ کاری جاری ہے۔
