حرم مقدس امیرالمؤمنین علیہالسلام کی سرپرستی میں، ادارہ حج و عمرہ کے شعبۂ تبلیغ و تحقیقات نے حج سیزن 1447ھ / 2026ء کے لیے کی سالانہ کانفرنس کا انعقاد کیا، جس میں 600 سے زائد مرد و خواتین حج معلمین اور معلمات نے شرکت کی۔ یہ کانفرنس صحن حضرت فاطمہ زہرا سلاماللہعلیہا میں واقع حضرت آمنہ سلاماللہعلیہا ہال میں منعقد ہوئی۔
کانفرنس میں حرم مقدس امیرالمؤمنین علیہالسلام کے متولی سید عیسیٰ الخرسان اور حج و عمرہ ادارہ کے سربراہ شیخ سامی المسعودی کے علاوہ حوزۂ علمیہ کے ممتاز علماء، مراجع عظام کے نمائندگان اور صوبہ نجف اشرف کے مقامی حکام نے شرکت کی۔
شیخ سامی المسعودی نے اپنے خطاب میں حجاج کی خدمت میں دینی رہنمائی کے کردار کی اہمیت پر زور دیتے ہوئے کہا کہ حج معلمین کے لیے ضروری ہے کہ وہ حج کے دوران قواعد و ضوابط کی مکمل پابندی کریں اور حجاج کی صحیح رہنمائی کریں تاکہ وہ مناسک حج کو درست طریقے سے ادا کر سکیں۔
حوزۂ علمیہ نجف اشرف کے استاد سید احمد الاشکوری نے اپنے خطاب میں مبلغین و مبلغات کے کردار کو اجاگر کرتے ہوئے کہا کہ دین کی تبلیغ ایک عظیم امانت ہے، اور حوزات علمیہ اور مراجع عظام ہمیشہ دین کے تحفظ اور شریعت کی پاسداری میں بنیادی ستون رہے ہیں۔
کانفرنس میں مرحوم سید محمد علی بحر العلوم کی خدمات کو خراج عقیدت پیش کرنے کے لیے ایک دستاویزی فلم بھی دکھائی گئی، جس میں حجاج اور معلمین کے لیے ان کی خدمات کو اجاگر کیا گیا۔
شعبۂ تبلیغ و تحقیقات کے نمائندے سید رشید الحسینی نے حج کے دوران معلمین و مبلغین کی موجودگی کو ضروری قرار دیتے ہوئے کہا کہ وہ حجاج کی رہنمائی کے ساتھ ساتھ اہل بیت علیہمالسلام کا پیغام بھی پہنچائیں اور فقہی احکام کی پابندی کو یقینی بنائیں۔
حرم مقدس امیرالمؤمنین علیہالسلام کے شعبۂ امور دینیہ کے سربراہ شیخ کرار الخفاجی نے نیوز سینٹر سے گفتگو کرتے ہوئے بتایا کہ کانفرنس ’’دینی رہنمائی انبیاء کا پیغام‘‘ کے عنوان کے تحت منعقد کی گئی ہے، جس کا مقصد حج معلمین کو تربیت دینا اور انہیں ضروری شرعی رہنمائی فراہم کرنا ہے۔
انہوں نے مزید بتایا کہ حرم مقدس امیرالمؤمنین علیہالسلام حجاج کی خدمت کے لیے مختلف پروگرام پیش کرتا ہے، جن میں ’’حج ورچوئل ٹریننگ‘‘ بھی شامل ہے، جس کے ذریعے حجاج کو عملی طور پر مناسک حج کی تربیت دی جاتی ہے۔
ادارہ حج و عمرہ کے شعبۂ تحقیقات کے ڈائریکٹر شیخ طالب عزیز نے کہا کہ یہ کانفرنس ہر سال حرم مقدس امیرالمؤمنین علیہالسلام میں منعقد ہوتی ہے، جس کا مقصد حج معلمین کے کردار کو مضبوط بنانا اور ان میں دینی شعور کو فروغ دینا ہے، جبکہ انہوں نے اس حوالے سے حرم مقدس امیرالمؤمنین علیہالسلام کے کردار کو سراہا۔
قابل ذکر ہے کہ حرم مقدس امیرالمؤمنین علیہالسلام ہر سال ہزاروں حجاج کو خدمات فراہم کرتا ہے، جس کے ذریعے ان کے دینی شعور کو بہتر بنایا جاتا ہے تاکہ وہ حج پر روانگی سے قبل مکمل رہنمائی حاصل کر سکیں۔
