حرم مقدس امیرالمؤمنین علیہالسلام کے متولی سید عیسیٰ الخرسان کی سربراہی میں ایک وفد نے صوبہ بصرہ کا دورہ کیا، جہاں انہوں نے حالیہ صہیونی-امریکی جارحیت کے نتیجے میں شہید ہونے والوں کے اہل خانہ سے ملاقات کی اور زخمیوں کی عیادت کی۔
حرم مقدس کی مجلس نظما کے رکن خادم حیدر العیساوی نے نیوز سینٹر سے گفتگو کرتے ہوئے کہا کہ یہ اقدام ان پاکیزہ خونوں کو خراج عقیدت پیش کرنے کے لیے کیا گیا ہے جو وطن کی سرزمین پر بہائے گئے۔ انہوں نے کہا کہ یہ شہداء کے اہل خانہ اور زخمیوں کے ساتھ ہمدردی اور یکجہتی کا ایک ادنیٰ سا اظہار ہے، جو ان کی مشکلات کو کم کرنے اور ان کے ساتھ کھڑے ہونے کے لیے مختلف اقدامات کے سلسلے کا حصہ ہے۔
انہوں نے مزید کہا کہ حرم مقدس امیرالمؤمنین علیہالسلام اپنی دینی اور اخلاقی ذمہ داری کے تحت ان متاثرہ خاندانوں کی مدد اور کفالت کے لیے اپنے انسانی و سماجی کردار کو جاری رکھے ہوئے ہے۔
حیدر العیساوی نے وضاحت کی کہ یہ اقدام 15 عراقی صوبوں سے تعلق رکھنے والے شہداء اور زخمیوں کے درجنوں خاندانوں سے ملاقات کے ایک وسیع پروگرام کا حصہ ہے، جس کا آغاز جنوبی ترین صوبے بصرہ سے کیا گیا ہے اور دیگر صوبوں میں بھی وفود روانہ کیے جائیں گے۔
انہوں نے بتایا کہ پہلے وفد کی قیادت حرم مقدس کے متولی نے خود کی، جس میں شعبۂ میڈیا اور تعلقات عامہ کے نمائندہ خدام بھی شامل تھے۔
دوسری جانب شہداء اور زخمیوں کے متعدد اہل خانہ نے حرم مقدس امیرالمؤمنین علیہالسلام کی اس کاوش کو سراہا اور ان کی طرف سے اظہار ہمدردی اور تعاون پر شکریہ ادا کیا، انہوں نے اس دورے کو امیرالمؤمنین علیہالسلام کی کرم نوازی اور برکتوں کا مظہر قرار دیا۔
