حرم مقدس امیرالمؤمنین علیہالسلام کے انجینئرنگ امور کے شعبے کے انجینئر اور دوسرے قنبر تعلیمی کمپلیکس منصوبہ کے مینیجر، مصطفیٰ قاسم الموسوی نے کہا کہ منصوبے کی تکمیل کی شرح 94 فیصد سے تجاوز کر چکی ہے، انہوں نے اس بات پر زور دیا کہ آئندہ تعلیمی سال کے آغاز پر اس منصوبے کا متوقع ہے جبکہ کام کی رفتار تیز ہو چکی ہے اور آخری مراحل جاری ہیں۔
انہوں نے وضاحت کی کہ یہ منصوبہ ایک مکمل مربوط ڈیزائن پر مشتمل ہے۔
الموسوی کے مطابق یہ منصوبہ دو ہائی اسکولوں پر مشتمل ہے، ایک لڑکیوں کے لیے اور ایک لڑکوں کے لیے،انہوں نے کہا کہ یہ کمپلیکس جدید ترین تعلیمی ماڈلز میں سے ایک ہے جسے اعلیٰ انجینئرنگ اور تعلیمی معیار کے مطابق ڈیزائن کیا گیا ہے۔
انہوں نے بتایا کہ منصوبے کا رقبہ 9800 مربع میٹر ہے، جبکہ تعمیر شدہ رقبہ 7800 مربع میٹر ہے، ہر اسکول میں 30 کلاس رومز کے ساتھ ساتھ میٹنگ رومز اور کیمسٹری، فزکس، بایولوجی اور کمپیوٹر سائنس کے لیے خصوصی سائنسی لیبارٹریز شامل ہیں تاکہ ایک جدید تعلیمی ماحول کو فروغ دیا جا سکے۔
جدید سہولیات کے حوالے سے انہوں نے کہا کہ منصوبے میں ایک مکمل اسٹوڈنٹ کلب شامل ہے جس میں مختلف کھیلوں اور تفریحی سرگرمیوں کے ہالز موجود ہیں، اس کے علاوہ جدید فٹبال میدان اور ایک جدید سائنسی لائبریری بھی شامل ہے، جو اس تعلیمی کمپلیکس کو عراق کے دیگر اسکولوں سے ممتاز بناتی ہے۔
انہوں نے مزید بتایا کہ دونوں اسکولوں میں جدید فائر فائٹنگ سسٹم اور ابتدائی آگاہی کے نظام نصب کیے گئے ہیں، اسی طرح ایک جدید آڈیو سسٹم بھی فراہم کیا گیا ہے، جبکہ طلبہ کی ضروریات کو پورا کرنے اور محفوظ و ترقی یافتہ تعلیمی ماحول قائم کرنے کے لیے تمام بنیادی سہولیات فراہم کی گئی ہیں۔
انہوں نے کہا کہ اس منصوبے میں حرم مقدس امیرالمؤمنین علیہالسلام کے ڈیزائن شعبے کے تیار کردہ جدید آرکیٹیکچرل ڈیزائنز شامل ہیں، جن میں کھلے مقامات اور خوبصورت مناظر کو خصوصی اہمیت دی گئی ہے اور جدید سہولیات کو اپنایا گیا ہے، انہوں نے زور دیا کہ اسکولوں کو اعلیٰ معیار کے مطابق جدید فرنیچر اور تعلیمی آلات سے بھی آراستہ کیا جائے گا۔
قابل ذکر ہے کہ یہ منصوبہ حرم مقدس امیرالمؤمنین علیہالسلام کے زیرِ اہتمام اہم ترین تعلیمی اقدامات میں سے ایک ہے، جس کا مقصد نجف شہر کے شمالی علاقوں کے طلبہ کی معاونت کرنا اور تعلیمی معیار اور تعلیمی انفراسٹرکچر کو بہتر بنانا ہے۔
