حرم مطہر امیرالمومنین امام علی علیہ السلام نے باصلاحیت افراد کی تربیت اور انسانی صلاحیتوں کو نکھارنے کے لیے ’’مربی علوی‘‘ تعلیمی پروگرام کا آغاز کیا ہے۔ حرم کے نظم و انتظامی ادارے کے شعبۂ تعلیم و ترقی کے زیر اہتمام جاری اس پروگرام کا مقصد ایسے باصلاحیت افراد تیار کرنا ہے جو جدید اور پیشہ ورانہ تربیتی طریقوں کے ذریعے مؤثر تعلیمی کورسز اور خصوصی ورکشاپس منعقد کر سکیں۔
پروگرام کے پہلے مرحلے میں ۳۹۸ امیدواروں نے ’’منتسب‘‘ ایپلی کیشن کے ذریعے آن لائن امتحان میں حصہ لیا، جن میں سے ۱۲۷ امیدوار دوسرے مرحلے کے لیے منتخب ہوئے ہیں۔
دوسرے مرحلے میں منتخب امیدواروں کے انٹرویوز لیے جائیں گے۔ اس مقصد کے لیے تشکیل دی گئی خصوصی کمیٹی مقررہ معیار کے مطابق امیدواروں کی ابلاغی اور پریزنٹیشن کی صلاحیت، اظہار خیال، مؤثر انداز میں بات سمجھانے اور قائل کرنے کی قابلیت کا جائزہ لے گی۔ اس کے ساتھ ساتھ تربیتی شعبے میں مزید سیکھنے، ترقی کرنے اور اپنی صلاحیتوں کو بہتر بنانے کے لیے ان کی آمادگی کا جائزہ لیا جائے گا۔
امیدواروں کی یہ مرحلہ وار جانچ اور انتخاب اس لیے کیا جا رہا ہے تاکہ ان افراد کی شناخت کی جا سکے جو تربیت کاری کے میدان میں مطلوبہ صلاحیت اور استعداد رکھتے ہوں۔ منتخب امیدواروں کو آئندہ مراحل میں خصوصی تربیت اور استعداد سازی کے مواقع فراہم کیے جائیں گے۔
مربی علوی پروگرام حرم مطہر امیرالمومنین علیہالسلام کے ان اہم منصوبوں میں شامل ہے جن کا مقصد انسانی صلاحیتوں کی شناخت، تربیت اور پرورش ہے۔ یہ پروگرام امیدواروں کے لیے ایک منظم اور تدریجی تربیتی راستہ فراہم کرتا ہے؛ ایسا راستہ جو ابتدائی جانچ اور انتخاب سے شروع ہو کر تربیت و استعداد سازی کے مراحل سے گزرتا ہے اور بالآخر انہیں پیشہ ورانہ اور مؤثر تربیت کار کے طور پر خدمات انجام دینے کے لیے تیار کرتا ہے۔
