حرم مقدس امیرالمومنین علیہالسلام کے مرکزِ ’’نظم‘‘، شعبۂ منصوبہ بندی و ترقی نے شعبۂ تعلیم و ترقی کے ذریعے نجف اشرف کے محکمۂ ٹریفک کے تعاون سے خصوصی اور تربیتی ورکشاپس منعقد کیں۔ ان ورکشاپس میں حرم مقدس امیرالمومنین علیہالسلام کے مختلف شعبوں میں ڈرائیور کی حیثیت سے خدمات انجام دینے والے خدام نے شرکت کی۔
یہ اقدام ترقیاتی پروگراموں کے تحت ڈرائیوروں میں ٹریفک سے متعلق آگاہی بڑھانے اور ٹریفک قوانین و ضوابط کی پابندی کو یقینی بنانے کے لیے کیا گیا۔ اس کا مقصد ڈرائیونگ کے لیے زیادہ محفوظ ماحول فراہم کرنا، ڈرائیوروں اور مسافروں کی سلامتی کو یقینی بنانا اور دورانِ خدمت پیش آنے والی مختلف ٹریفکی صورتِ حال سے درست انداز میں نمٹنے کی صلاحیت کو بہتر بنانا ہے۔
شعبۂ تعلیم و ترقی کے ذمہ دار حسن الہنداوی نے کہا:
’’ان ورکشاپس میں حرم مقدس امیرالمومنین علیہالسلام کے مختلف شعبوں میں خدمات انجام دینے والے ۹۰۰ سے زائد ڈرائیوروں نے شرکت کی۔ یہ تربیتی پروگرام ٹریفک اور قانون کے ماہرین کے تعاون سے منعقد کیے گئے، تاکہ ڈرائیوروں کی پیشہ ورانہ نوعیت اور روزمرہ ضروریات کے مطابق تربیتی مواد فراہم کیا جا سکے۔‘‘
انہوں نے مزید کہا:
’’ہم نے کوشش کی کہ تربیت صرف نظریاتی پہلو تک محدود نہ رہے۔ اسی لیے پروگرام میں عملی سرگرمیوں اور حقیقی ٹریفکی صورتِ حال کی مشقیں بھی شامل کی گئیں، تاکہ معلومات بہتر طور پر ذہن نشین ہوں اور دورانِ ڈرائیونگ عملی مہارتوں میں تبدیل ہوسکیں۔‘‘
ان ورکشاپس میں ٹریفک سیفٹی، محفوظ ڈرائیونگ کے اصول، ٹریفک قوانین و ہدایات اور دورانِ ملازمت ڈرائیور کی ذمہ داریوں جیسے مختلف موضوعات کا جائزہ لیا گیا۔ اس کے علاوہ ملازمین اور مہمانوں کی نقل و حمل کے دوران ڈرائیور کی ذمہ داریوں اور ضروری احتیاطی تدابیر سے بھی آگاہ کیا گیا۔
ان ورکشاپس کا انعقاد حرم مقدس امیرالمومنین علیہالسلام کی انتظامیہ کی جانب سے انسانی وسائل کی ترقی اور ملازمین کی پیشہ ورانہ صلاحیتوں کو بہتر بنانے کی پالیسی کا حصہ ہے۔ اس مقصد کے لیے حرم مقدس امیرالمومنین علیہالسلام کے مختلف شعبوں میں ملازمین کی ذمہ داریوں اور فرائض کی نوعیت کے مطابق خصوصی تربیتی پروگرام منعقد کیے جاتے ہیں۔
