موقع کے انچارج خادم فاضل خلف نے بتایا کہ یہاں روزانہ تقریباً ۳۰ ہزار کھانے تقسیم کیے جاتے ہیں، جبکہ زائرین کی تعداد میں اضافے کے ساتھ بعض دنوں میں یہ تعداد ۵۰ ہزار کھانوں تک پہنچ جاتی ہے۔ اس کے علاوہ ہزاروں ہلکی ضیافتیں بھی زائرین میں تقسیم کی جاتی ہیں۔
انہوں نے مزید بتایا کہ ضیافت کا یہ پروگرام ماہِ صفر کی سات تاریخ سے شروع کیا گیا، جو اربعین کی زیارت کے اختتام تک جاری رہے گا۔ اس دوران روزانہ تین وقت کا کھانا پیش کیا جاتا ہے، جس کی تیاری اور تقسیم میں ۷۰ سے زائد خدام اور رضاکار حصہ لے رہے ہیں۔
انہوں نے کہا کہ حرم مقدس اميرالمومنين عليہ السلام نے اربعین کے دوران زائرین کی خدمت کے لیے مجموعی طور پر ۱۸ ضیافتی مراکز قائم کیے ہیں، جو نجفِ اشرف کی اہم شاہراہوں پر واقع ہیں، تاکہ لاکھوں زائرین کو بروقت اور منظم انداز میں کھانے کی سہولت فراہم کی جا سکے۔
