حرم مقدس امیرالمؤمنین علیہالسلام کی جانب سے عراق کے صوبہ بصرہ میں عید غدیر کے موقع پر سب سے بڑا پرچم غدیر لہرایا گیا۔ اس تقریب میں دینی، سماجی اور قبائلی شخصیات نے شرکت کی جبکہ 150 سے زائد مقامات پر عالمی سطح پر پرچم کشائی کی مہم جاری ہے۔
عید اللہ الاکبر کے موقع پر اور عراق و دنیا کے 150 سے زائد مقامات پر پرچم غدیر بلند کرنے کے پروگرام کے تحت، حرم مقدس امیرالمؤمنین علیہالسلام مجلس نظما نے بصرہ میں پرچم غدیر کی پرچم کشائی کی، یہ تقریب مرجع عالیقدر کے نمائندے اور قمر بنی ہاشم علیہالسلام فاؤنڈیشن کے تعاون و ہم آہنگی سے منعقد کی گئی۔
اس تقریب میں حرم مقدس امیرالمؤمنین علیہالسلام کی مجلس نظما کے رکن مصطفی منی اپنے وفد کے ہمراہ، مرجع عالیقدر کے نمائندہ حجت الاسلام والمسلمین سید آصف موسوی بطور نمائندہ ، قمر بنی ہاشم علیہالسلام فاؤنڈیشن کے ذمہ داران، علما، قبائلی مشایخ اور صوبہ بصرہ کی سماجی شخصیات نے شرکت کی۔
تقریب کے افتتاحی خطاب میں مصطفی منی نے کہا کہ ان دنوں میں عید اللہ الاکبر، عید غدیر کی خوشبو ایک بار پھر ہمارے درمیان زندہ ہو جاتی ہے۔ یہ وہ عظیم مناسبت ہے جو اس حقیقت کو یاد دلاتی ہے جسے رسول اکرم صلی اللہ علیہ وآلہ نے امت کے دلوں میں ہمیشہ کے لیے باقی رکھنے کا ارادہ فرمایا تھا، اور وہ حقیقت امیرالمؤمنین علیہالسلام کی ولایت ہے، جو رسالت کا تسلسل، اس کے معانی کی حفاظت اور انسان کی ہدایت، عدل کے قیام اور دین کو انحراف و شبہات سے بچانے کی ضامن ہے۔
انہوں نے عید اللہ الاکبر کی عظمت کو اجاگر کرتے ہوئے ولایت، عہد و بیعت کی تجدید کی اہمیت پر زور دیا اور اس تقریب کے انعقاد میں مرجع عالیقدر کے نمائندے، قمر بنی ہاشم علیہالسلام فاؤنڈیشن اور مؤمنین کی مشترکہ کوششوں کو سراہا۔
واضح رہے کہ بصرہ میں لہرایا گیا یہ پرچم عراق کے مختلف صوبوں میں لہرائے جانے والے پرچموں میں سب سے بڑا پرچم ہے، جو 100 مربع میٹر اور اس کا ستون 27 میٹر بلند ہے۔
یہ بھی قابل ذکر ہے کہ پرچم غدیر کی پرچم کشائی بین الاقوامی ہفتۂ غدیر کے اہم ترین پروگراموں میں شامل ہے، جو عراق اور دنیا کے 150 سے زائد مقامات پر مقدس روضوں، زیارت گاہوں اور اہم عوامی مقامات پر منعقد کیا جا رہا ہے، تاکہ ولایت، وفاداری اور عید غدیر کی عظمت کو بھرپور انداز میں اجاگر کیا جا سکے۔
