عرب دنیا کے نامور شعراء کی ایک بڑی تعداد پانچویں بین الاقوامی جشنوارۂ شعر نبوی صلی اللہ علیہ وآلہ میں شرکت کے لیے نجف اشرف پہنچ رہی ہے۔ یہ جشنوارہ پانچویں بین الاقوامی ہفتۂ صادقین کے اہم ثقافتی و ادبی پروگراموں میں شامل ہے، جس میں مختلف ممالک سے تعلق رکھنے والے شعراء حرم مقدس امیرالمومنین علیہ السلام کے جوار میں جمع ہوکر رسولِ اکرم حضرت محمد مصطفیٰ صلی اللہ علیہ وآلہ کی ولادت باسعادت کو خراج عقیدت پیش کریں گے۔
جشنوارے کی تقریبات منگل، ۱۸ ربیع الاول ۱۴۴۸ ہجری کو صحن حضرت فاطمہ سلام اللہ علیہا میں ’’اس کے در سے مدینے کی جانب‘‘ کے عنوان سے منعقد ہوں گی۔
مختلف عرب ممالک کے شعراء کی شرکت
جشنوارے کے انتظامی امور کے سربراہ جعفر البديري نے نیوز سینٹر سے گفتگو کرتے ہوئے بتایا کہ جشنوارے کی سرگرمیاں دو روز تک جاری رہیں گی، جن میں مصر، لبنان، لیبیا، عمان، مراکش اور سوڈان سمیت مختلف عرب ممالک کے ممتاز شعراء شرکت کریں گے۔
انہوں نے کہا کہ عرب شعراء کے علاوہ اسلامی جمہوریہ ایران سے بھی ایک شاعر اس ادبی اجتماع میں شریک ہوگا، جبکہ نجف اشرف اور عراق کے دیگر شہروں سے تعلق رکھنے والے متعدد شعراء بھی اپنی شعری پیشکشیں پیش کریں گے۔
شعر و سیرت پر مبنی ڈرامائی پیشکشیں
جعفر البديري نے مزید بتایا کہ جشنوارے کی شعری نشستوں کے دوران پہلی مرتبہ دو ڈرامائی پیشکشیں بھی پیش کی جائیں گی۔ ان ڈراموں میں معروف مسلم اور عرب شعراء کی زندگی اور تاریخی سیرت کو اجاگر کیا جائے گا، خصوصاً ان شخصیات کو جنہوں نے رسولِ اکرم صلی اللہ علیہ وآلہ کی نورانی سیرت کے مختلف واقعات کو اپنے شعری کلام کے ذریعے محفوظ اور اجاگر کرنے میں نمایاں کردار ادا کیا۔
پانچویں بین الاقوامی ہفتۂ صادقین کے پروگراموں میں قرآنی، ثقافتی، علمی، ادبی اور مکالماتی سرگرمیوں کے ساتھ مختلف سماجی پروگرام اور ممتاز شخصیات کی تجلیل بھی شامل ہے۔
یہ پروگرام حرم مقدس امیرالمومنین علیہ السلام کے جوار، نجف اشرف کے مختلف مقامات اور عراق کے دیگر علاقوں میں منعقد کیے جائیں گے، جبکہ ہفتۂ صادقین کی بعض سرگرمیوں کا دائرہ بیرونِ ملک بھی پھیلایا جائے گا۔
