جامع خدمت رسانی منصوبہ
شعبۂ خدماتی گاڑیوں کے ذمہ دار خادم منتظر علوان جابر نے بتایا کہ شعبے نے مواکب کی معاونت کے لیے ضروری گاڑیاں تیار کرکے اپنے خدمت رسانی منصوبے پر عمل درآمد شروع کر دیا ہے۔ اس منصوبے کے تحت مواکب کو پینے کے قابل صاف اور جراثیم سے پاک پانی کے علاوہ نلکے کا پانی بھی فراہم کیا جا رہا ہے۔ انہوں نے بتایا کہ اس منصوبے پر قدیم شہر کی بلدیہ اور شعبۂ امورِ خدمات کے تعاون سے عمل درآمد کیا جا رہا ہے۔
۴۷ خدماتی گاڑیاں
منتظر علوان جابر نے بتایا کہ اس منصوبے میں مختلف نوعیت کی تقریباً ۴۷ خدماتی گاڑیاں شامل ہیں، جن میں پانی کے ٹینکر، کچرا اٹھانے والی گاڑیاں اور سیوریج کی گاڑیاں شامل ہیں۔
انہوں نے مزید کہا کہ پانی کے ٹینکروں کی یونٹ نے قدیم شہر کے اندر اور باہر ۱۰۰ سے زائد خدمت رسان مواکب کو پانی کی فراہمی شروع کر دی ہے، جبکہ حرم مقدس اميرالمومنين (عليہالسلام) سے وابستہ خدمت رسانی مراکز کو بھی پانی فراہم کیا جا رہا ہے۔ روزانہ تقریباً ۲ لاکھ لیٹر پینے کا صاف پانی اور نلکے کا پانی فراہم کیا جاتا ہے۔
اس کے علاوہ روزانہ ۱۵۰ سے ۲۰۰ ٹن کچرا جمع کرکے مخصوص گاڑیوں کے ذریعے اسے صحت بخش طریقے سے تلف کرنے کے لیے مقررہ مقامات تک منتقل کیا جا رہا ہے۔
یہ اعداد و شمار حرم مقدس اميرالمومنين (عليہالسلام) میں زائرین کی خدمت کے لیے جاری وسیع پیمانے پر خدماتی اور لاجسٹک تیاریوں کی عکاسی کرتے ہیں۔ ان اقدامات کا مقصد زائرین کی آمد و رفت کو سہل بنانا اور خدمت رسان مواکب کو زائرین کی بہتر خدمت کے لیے ضروری سہولیات فراہم کرنا ہے۔
