حرم مقدس امیرالمومنین علیہ السلام کے شعبۂ فکری و ثقافتی امور سے وابستہ دارالقرآن کی جانب سے پانچویں بین الاقوامی ہفتۂ صادقین کی مناسبت سے حرم مقدس امیرالمومنین علیہ السلام میں قرآنی محفل منعقد کی گئی۔
اس محفل میں عراق کے اندرون و بیرونِ ملک سے تعلق رکھنے والے قرّاء اور مدّاحان کے علاوہ حرم مقدس امیرالمومنین علیہ السلام کے زائرین کی ایک بڑی تعداد نے شرکت کی۔
دارالقرآن کے ذمہ دار علاء محسن نے کہا: ’’اس محفل میں حرم مقدس عسکری کے قاری و مؤذن اسحاق العطیہ اور اسلامی جمہوریہ ایران کے بین الاقوامی قاری یونس شاہ مرادی نے شرکت کی۔ اسی طرح مقدس شہر کربلا کے مدّاح اور منقبت خواں علی العنبر نے بھی اس پروگرام میں حصہ لیا، جبکہ حرم مقدس امیرالمومنین علیہ السلام کے ترانوں کے گروپ نے محفل کے اختتامی حصے میں اپنی پیشکش پیش کی۔‘‘
انہوں نے مزید کہا: ’’اس محفل کو حرم مقدس امیرالمومنین علیہ السلام میں حاضری کی سعادت حاصل کرنے والے زائرین کی جانب سے بھرپور پذیرائی حاصل ہوئی۔‘‘
دارالقرآن کے ذمہ دار نے مزید بتایا: ’’محفل کے دوران حرم امیرالمومنین علیہ السلام کے زائرین اور ان تمام حاضرین کے لیے تبرکی تحائف کی قرعہ اندازی بھی کی گئی، جنہوں نے محفل میں پیش کی جانے والی تلاوتوں کو سماعت کیا۔‘‘
انہوں نے کہا: ’’یہ قرآنی محفل پانچویں بین الاقوامی ہفتۂ صادقین کے پروگراموں میں شامل ہے، جس کا اہتمام حرم مقدس امیرالمومنین علیہ السلام کی تولیت کی جانب سے رسولِ گرامی اسلام حضرت محمد مصطفیٰ صلی اللہ علیہ وآلہ وسلم اور آپؐ کے گرامی قدر نواسے حضرت امام جعفر صادق علیہ السلام کی ولادتِ باسعادت کی مناسبت سے کیا جا رہا ہے۔‘‘
واضح رہے کہ حرم مقدس امیرالمومنین علیہ السلام کی تولیت مسلسل پانچویں سال بین الاقوامی ہفتۂ صادقین کی تقریبات کا انعقاد کر رہی ہے۔ اس ہفتے میں شعری جشنواروں، ثقافتی پروگراموں، مکالماتی نشستوں، قرآنی و عوامی محافل، آن لائن مقابلوں، بچوں کے لیے خصوصی تربیتی پروگراموں اور تعلیمی و تربیتی ورکشاپس سمیت مختلف پروگرام شامل ہیں۔ اس کے علاوہ ہفتۂ صادقین کی بعض محافل دنیا کے مختلف ممالک، جن میں جمہوریہ آذربائیجان اور پاکستان بھی شامل ہیں، میں منعقد کی جائیں گی۔
