حرم مقدس امیرالمومنین علیہ السلام کے شعبۂ تعلقاتِ عامہ نے پانچویں بین الاقوامی ہفتۂ صادقین کی تقریبات کے آغاز کا اعلان کیا ہے۔ یہ پروگرام رسولِ اکرم حضرت محمد مصطفیٰ صلی اللہ علیہ وآلہ اور آپ کے گرامی قدر نواسے حضرت امام جعفر صادق علیہ السلام کی ولادت باسعادت کی مناسبت سے منعقد کیے جا رہے ہیں۔ ان تقریبات کا باقاعدہ آغاز حرم مقدس امیرالمومنین علیہ السلام میں ولادت کا پرچم لہرانے کی پُرشکوہ تقریب سے ہوا، جس میں خوشی و مسرت سے بھرپور روحانی ماحول دیکھنے میں آیا۔
شعبۂ تعلقاتِ داخلی کے ذمہ دار کرار شانی نے نیوز سینٹر سے گفتگو کرتے ہوئے کہا: ’’اس ہفتے کے دوران ثقافتی، دینی اور سماجی نوعیت کے مختلف جامع پروگرامز اور جشن و تہوار منعقد کیے جائیں گے، جن کا انعقاد عراق کے اندر اور بیرونِ ملک بھی ہوگا۔‘‘
انہوں نے مزید کہا:
’’اس ہفتے کے اہم ترین پروگراموں میں پندرہواں جشنوارۂ شعر پیغمبر اعظم شامل ہے، جس میں بین الاقوامی سطح کے شعرا اور مختلف عرب ممالک کے ممتاز شعراء کی بڑی تعداد شرکت کرے گی۔
اسی طرح قرآنی اور ثقافتی پروگرام بھی منعقد کیے جائیں گے، جن کا مقصد سیرت اہل بیت علیہم السلام کو فروغ دینا، اس حوالے سے آگاہی کو مزید گہرا کرنا اور دنیا کے مختلف خطوں سے آنے والے زائرین کے سامنے اس سیرت کے انسانی اور دینی پہلوؤں کو اجاگر کرنا ہے۔‘‘
حرم مقدس امیرالمومنین علیہ السلام پانچویں دور کے ہفتۂ صادقین کے دوران اس عظیم اسلامی مناسبت کو انتہائی شاندار اور شایانِ شان انداز میں منعقد کرنے کے لیے بھرپور کوششیں کر رہا ہے، تاکہ معاشرے کے تمام طبقات میں دینی و ثقافتی شعور کے فروغ اور آگاہی میں مؤثر کردار ادا کیا جا سکے۔
