حرم مقدس امیرالمؤمنین علیہالسلام کے متولی سید عیسیٰ الخرسان نے حرم امامین عسکریین علیہماالسلام کی زیارت کے بعد سامرہ میں حرم مقدس امیرالمؤمنین علیہالسلام کے خدماتی موکب کا معائنہ کیا اور زائرین کی خدمت میں مصروف خادمین کی جانب سے کی جانے والی سکیورٹی، خدمات اور مہمان نوازی کی کوششوں کو سراہا۔
حرم مقدس امیرالمؤمنین علیہالسلام کے متولی سید عیسیٰ الخرسان نے شہر سامرہ میں حرم امامین عسکریین علیہماالسلام کی زیارت کے ساتھ ساتھ حرم مقدس کے زیر انتظام خدماتی موکب کا بھی دورہ کیا اور زائرین کو فراہم کی جانے والی مختلف سہولیات کا براہ راست مشاہدہ کیا۔
اس موقع پر سید عیسیٰ الخرسان نے امام حسن عسکری علیہالسلام کی شہادت کے موقع پر منعقدہ مرکزی مجالس کے لیے حرم مقدس امیرالمؤمنین علیہالسلام کی جانب سے فراہم کی جانے والی سکیورٹی، خدماتی اور مہمان نوازی سے متعلق سرگرمیوں کا تفصیلی جائزہ لیا،انہوں نے وہاں موجود خادمین کی کوششوں کو سراہتے ہوئے ان کی خدمت کو قابل فخر قرار دیا۔
قابل ذکر ہے کہ حرم مقدس امیرالمؤمنین علیہالسلام نے سامرہ میں امام حسن عسکری علیہالسلام کی شہادت کی مناسبت سے منعقدہ پروگراموں کے لیے ایک منظم اور پیشگی تیار شدہ منصوبہ ترتیب دیا جس کے تحت حرم مقدس کے مختلف شعبہ جات سے 150 سے زائد خادمین مرکزی موکب میں شریک ہوئے۔
ان خادمین نے زائرین کی خدمت، سکیورٹی، طبی امداد، کھانے کی فراہمی، قیام و طعام سمیت مختلف امور میں اہم کردار ادا کیا تاکہ زائرین کو ہر ممکن سہولت مہیا کی جا سکے۔
