عراق کی وزیر مواصلات ڈاکٹر ہیام الیاسری نے حرم مقدس امیرالمؤمنینؑ کے سرکاری دورے کے دوران حرم مقدس کے سیٹلائٹ میڈیا نیٹ ورک میں استعمال ہونے والی جدید ٹیکنالوجی کو سراہا اور میڈیا نشریات و پروڈکشن کے شعبے میں سرگرم فنی ٹیم کی کاوشوں کو خراج تحسین پیش کیا۔
اس دورے میں صحن حضرت فاطمہ زہرا سلام اللہ علیہا میں قائم جدید صوتی نظام کے خصوصی کنٹرول روم کا مشاہدہ بھی شامل تھا، جو زیارت اربعین کے لیے حرم مقدس کی جانب سے شروع کیے گئے یکساں مواصلاتی منصوبے کی افتتاحی تقریب کے موقع پر انجام پایا۔
حرم مقدس کے میڈیا نیٹ ورک کا میدان میں معائنہ
دورے کے دوران وزیر مواصلات ایک اعلیٰ سطحی حکومتی وفد کے ہمراہ تھیں، حرم مقدس امیرالمؤمنینؑ کے متولی جناب سید عیسی الخرسان، ان کے معاون، بورڈ کے اراکین اور شعبہ جات کے سربراہان نے اُن کا پُرتپاک استقبال کیا۔
جدید ترین 4K ٹیکنالوجی سے آراستہ نشریاتی مرکز
وفد نے آستان کے مرکزی نشریاتی مرکز (Control Room) کا بھی دورہ کیا، جو اعلیٰ معیار کی 4K نشریاتی ٹیکنالوجی پر کام کرتا ہے، اس نظام کو دینی میڈیا کی دنیا میں ایک اہم پیشرفت اور آستان کے فنی معیار کی علامت قرار دیا جا رہا ہے، کیونکہ یہ اہم مذہبی مواقع کی پروفیشنل کوریج کے لیے جدید ترین سہولیات مہیا کرتا ہے۔
عراق میں میڈیا کے شعبے میں نیا معیار
وزیر مواصلات ڈاکٹر الیاسری نے اپنے بیان میں کہا کہ حرم مقدس امیرالمؤمنینؑ میں موجود یہ جدید نظام عراق میں دینی و ثقافتی میڈیا کے میدان میں ایک انقلابی قدم ہے، جو اس بات کا ثبوت ہے کہ حرم مقدس عالمی معیار کا میڈیا مواد پیش کرنے کی صلاحیت رکھتا ہے، بالخصوص ان ایام میں جب لاکھوں زائرین اربعین میں شرکت کرتے ہیں۔
پیشہ ورانہ میڈیا خدمات کے لیے مکمل انفراسٹرکچر
حرم مقدس امیرالمؤمنینؑ کے میڈیا نظام میں ایک محفوظ اور الگ تھلگ ماسٹر کنٹرول روم، براہِ راست نشریات کا مخصوص اسٹوڈیو، اور ایک ڈیجیٹل پلیٹ فارم شامل ہے جو Feed Cleanسروس کے ذریعے دیگر نیٹ ورکس کو بھی اعلیٰ معیار کا مواد فراہم کرتا ہے، یہ نظام آستان کی جانب سے منعقدہ مذہبی و ثقافتی تقریبات کی درست اور مؤثر نشریات کو ممکن بناتا ہے۔
