حرم مقدس امیرالمؤمنین علیہالسلام نے امام حسین علیہ السلام کے زائرین کی خدمت کے لیے المرتضیٰ قیامگاہ کے اطراف واقع اراضی کو تیار کرنے کا عمل شروع کر دیا ہے۔
یہ قیامگاہ نجف سے کربلا کے راستے میں، ستون نمبر 96 کے قریب واقع ہے اور اربعین کے موقع پر زائرین کو خدمات فراہم کرنے کے لیے مخصوص کی جا رہی ہے۔
جناب زید کریم محمد نے حرم مقدس امیرالمؤمنین علیہالسلام کے میڈیا سینٹر سے گفتگو کرتے ہوئے بتایا کہ ماہر ٹیموں نے زمین ہموار کرنے اور کھدائی کا آغاز کر دیا ہے، یہ کام حرم مقدس کے انجینئرنگ اور تکنیکی شعبے کے تعاون سے انجام پا رہا ہے، اسی دوران قیامگاہ کے بیرونی حصے میں کنکریٹ ڈالنے کا عمل بھی شروع ہو چکا ہے۔
انہوں نے مزید وضاحت کی کہ اس منصوبے میں پانی کے تین کنوؤں کو مکمل طور پر تیار کرنے کا عمل بھی شامل ہے تاکہ زائرین کے لیے پینے کے پانی کی سہولت دستیاب ہو،المرتضیٰ قیامگاہ کی مکمل تزئین و آرائش اور مرد و خواتین زائرین کے لیے تمام ضروری سہولیات کی فراہمی بھی ترجیحات میں شامل ہے۔
جناب محمد نے اس بات کی بھی نشاندہی کی کہ زائرین کے لیے ایک مکمل طبی یونٹ بھی قائم کیا گیا ہے تاکہ صحت و علاج کی سہولت فراہم کی جا سکے ، قیامگاہ کے بیرونی ماحول کو اس انداز میں تیار کیا گیا ہے کہ زائرین کو ایک محفوظ، آرام دہ اور پرسکون فضا میسر آ سکے۔
واضح رہے کہ یہ تمام اقدامات حرم مقدس امیرالمؤمنین علیہالسلام کے اُس جامع خدماتی منصوبے کا حصہ ہیں جو اربعین کے دوران لاکھوں زائرین کی خدمت کے لیے ترتیب دیا گیا ہے۔
