حرم مقدس امیرالمؤمنین علیہ السلام کے انجینئرنگ ڈپارٹمنٹ کی نگرانی میں نجف میں 160 ہزار مربع میٹر رقبے پر 8 منزلہ جدید پارکنگ منصوبہ تعمیر ہو رہا ہے، جس میں الیکٹرانک سسٹم کے ذریعے پارکنگ کی سہولت فراہم کی جائے گی تاکہ زائرین اور شہریوں کو ٹریفک میں آسانی ہو۔
حرم مقدس امیرالمؤمنین علیہ السلام کے انجینئرنگ اور تعمیراتی شعبے کی نگرانی میں نجف اشرف میں بڑی پارکنگ کا منصوبہ، زیر تعمیر ہے، جو زائرین اور شہریوں کے لیے ٹریفک کے بوجھ کو کم کرنے اور بہتر خدمات فراہم کرنے کا ایک اہم اقدام ہے۔
جدید الیکٹرانک نظام
حرم مقدس امیرالمؤمنین علیہ السلام کے انجینئرنگ و تعمیراتی امور کے سربراہ مصطفی محبوبہ نے اس منصوبے کے بارے میں گفتگو کرتے ہوئے کہا کہ یہ پارکنگ منصوبہ نجف اشرف کے لیے خاص اہمیت رکھتا ہے کیونکہ یہ جدید الیکٹرانک سسٹم سے لیس ہوگا، جو خالی اور بھرے مقامات کی نشاندہی کرے گا،اس طرح زائرین کو بہترین سہولیات فراہم ہوں گی۔
160 ہزار مربع میٹر پر 8 منزلہ تعمیر
انہوں نے مزید کہا کہ یہ منصوبہ شہر کے پرانے حصے کی سڑکوں میں ٹریفک کے دباؤ کو کم کرنے اور آمد و رفت کو منظم کرنے میں اہم کردار ادا کرے گا، یہ 160000 مربع میٹر رقبے پر تعمیر ہو رہا ہے اور اس میں 8 منزلیں شامل ہیں،یہ پارکنگ دنیا بھر سے مرقد امیرالمؤمنینؑ کی زیارت کے لیے آنے والے زائرین کو سہولت فراہم کرے گی۔
دیگر جاری منصوبے
قابلِ ذکر ہے کہ حرم مقدس امیرالمؤمنین علیہ السلام رواں سال کے دوران کئی دیگر اہم منصوبوں پر بھی کام کر رہا ہے، جن میں کچھ اہم اس طرح ہیں:
خواتین کے لیے خصوصی عفاف ہسپتال
قالین دھلائی کا منصوبہ
شارع رسول اعظمؐ پر انڈر پاس
شیخ طوسی انڈر پاس
امام حجت عجل اللہ فرجہ الشریف انڈر پاس
یہ تمام منصوبے نجف کے شہریوں اور عراق و دنیا بھر سے آنے والے زائرین کی سہولت اور خدمت کے لیے ڈیزائن کیے گئے ہیں۔
