حرم مقدس امیرالمؤمنین علیہالسلام نے اپنے دارالقرآن سے وابستہ طالب علم کرار لیث البرزنچی کی بین الاقوامی قرآنی مقابلے میں عالمی سطح پر پہلی پوزیشن حاصل کرنے پر نہایت عزت و احترام کے ساتھ حوصلہ افزائی کی۔
یہ بین الاقوامی قرآنی مقابلہ روسی فیڈریشن کے علاقے جمہوریہ اینگوشیا میں منعقد ہوا تھا، جس میں دنیا بھر سے قاری شریک ہوئے۔
حرم مقدس امیرالمؤمنین علیہالسلام کے دارالقرآن یونٹ کے سربراہ علاء محسن، نے میڈیا سینٹر سے بات کرتے ہوئے کہا کہ دارالقرآن کے ایک وفد نے بغداد کا دورہ کیا تاکہ اس ممتاز طالب علم اور اس کے اہل خانہ کی حوصلہ افزائی کی جا سکے۔ اس ملاقات میں البرزنچی اور اس کے اہل خانہ کو حرم امیرالمؤمنین علیہالسلام کا پرچم اور متبرک تحائف پیش کیے گئے۔
علاء محسن نے مزید بتایا کہ کرار لیث البرزنچی کو عنقریب ہفتہ صادقین علیہماالسلام کی تقریبات کے دوران ہونے والی ایک خصوصی تقریب میں اعزاز سے نوازا جائے گا، جس میں حرم امیرالمؤمنین علیہالسلام کے دیگر علمی و قرآنی اداروں کے نمائندگان بھی شریک ہوں گے۔
کرار البرزنچی نے اس عزت افزائی پر حرم مقدس امیرالمؤمنین علیہالسلام کا شکریہ ادا کیا اور کہا کہ مجھے اس بات پر فخر ہے کہ میں حرم مقدس امیرالمؤمنین علیہالسلام کے دارالقرآن کا شاگرد ہوں اور حرم مقدس مجھ جیسے طلبا کی خصوصی سرپرستی کرتا ہے۔
انہوں نے اپنے استاد سید شبیر حسینی کا بھی خاص طور پر شکریہ ادا کیا، جنہوں نے صوت و نغموں کے اصول اور تلاوت کے فنون میں ان کی مہارت کو پروان چڑھایا، جس کی بدولت وہ اس عالمی مقابلے میں پہلی پوزیشن حاصل کرنے میں کامیاب ہوئے۔
