حرم مقدس امیرالمؤمنین علیہالسلام کی جانب سے 200 سے زائد موکبوں پر زائرین کو حمل و نقل کی خدمات فراہم کرنے کے لئے خصوصی گاڑیوں کا اہتمام کیا گیا ہے۔
حرم مقدس امیرالمؤمنین علیہالسلام کے شعبہ حمل و نقل کے سربراہ اسامہ بغدادی نے ایک انٹرویو میں بتایا کہ حرم مقدس کے متولی کے حکم سے اس شعبہ کے خادمین اربعین زائرین کے حمل و نقل اور خصوصی خدمات کے لیے اپنی بھرپور کوششیں جاری رکھے ہوئے ہیں،اس پروگرام میں 200 بڑی اور چھوٹی گاڑیوں کا ایک قافلہ زائرین کے حمل و نقل سے مخصوس کیا گیا ہے، جو متعلقہ محکموں کے ساتھ مل کر زائرین کو خدمات فراہم کر رہا ہے۔
اسامہ بغدادی نے کہا کہ موکبوں اور مہمان خانوں میں موجود گاڑیوں میں کوڑا اٹھانے والے ٹرک، پینے کے صاف پانی کے ٹینکرز، منرل پانی کے ٹینکرز اور سیوریج سسٹم کی نگرانی کرنے والی گاڑیاں شامل ہیں، جو ہنگامی منصوبے کے فریم ورک کے اندر اور متعلقہ سرکاری اداروں کے تعاون سے 24/7 کام کرتی ہیں۔
ہنگامی خدمات کے متعلق بغدادی نے وضاحت کرتے ہوئے کہا کہ اس سال کے منصوبے کے تحت حرم مقدس امیرالمؤمنین علیہالسلام اور اربعین پیدل مارچ کے راستے میں متعدد ایمبولینسیں اور فائر برگیڈ گاڑیاں تعینات کی گئی ہیں تاکہ منظم طور پر زائرین کی خدمت کی جا سکے۔
انہوں نے مزید کہا کہ اس سال زائرین کی واپسی کے لیے ایک خصوصی پروگرام تیار کیا گیا ہے جس کے تحت، امام حسین علیہالسلام کی زیارت سے واپس آنے والے زائرین کی خدمت کے لیے جدید پبلک ٹرانسپورٹ فراہم کیا گیا ہے، واپسی کا پروگرام خان الناس کے علاقے (حیدریہ) سے نجف اشرف کے صوبائی دارالحکومت تک ہے نیز اسے دیگر مقدس مقامات اور متعلقہ اداروں کے نقل و حمل کے محکموں کے ساتھ جوڑا جائے گا۔
شعبہ حمل و نقل کے سربراہ کے سربراہ نے بتایا کہ زائرین کو لے جانے کے لیے کئی کوسٹر گاڑیاں تیار کی گئی ہیں، جو عوامی نقل و حمل کے ساتھ ساتھ مبلغین اور خادمین کی منتقلی میں بھی مدد کریں گی، یہ گاڑیاں حرم مقدس امیرالمؤمنین علیہالسلام کے تمام مہمان خانوں اور خدمات کے مقامات کے لیے بھی مخصوص کی گئی ہیں۔
مزید برآں، نجف اشرف کے پرانے علاقے اور حرم مقدس کے قریب سڑکوں پر چھوٹی برقی گاڑیاں چلائی جائیں گی تاکہ بھیڑ بھاڑ والے علاقوں میں آسانی سے چلنے پھرنے اور ہنگامی صورت حال میں فوری مدد فراہم کی جا سکے۔
بغدادی نے کہا کہ وہ گاڑیاں جو دیگر صوبوں سے اربعین زائرین کی خدمت کے لیے بھیجی جا رہی ہیں، ان کو تمام ضروری وسائل سے لیس کیا جائے گا، جن میں ایندھن کی فراہمی، مرمت کے لیے جگہ، ڈرائیوروں کے لیے آرام گاہیں اور مہمان نوازی کے سامان شامل ہیں تاکہ وہ بہترین طریقے سے زائرین کی خدمت کر سکیں۔
یہ تمام اقدامات ایک پیشگی تیار کردہ منصوبے کا حصہ ہیں جو حرم مقدس امیرالمؤمنین علیہالسلام نے اربعین کے لیے تیار کیا ہے،اس منصوبے میں خاص طور پر زیارت کے لیے ایک آپریشن روم قائم کیا گیا ہے تاکہ لاکھوں زائرین کو زیارت میں سکون، ترتیب اور سہولت فراہم کی جا سکے۔
