حرم مقدس امیرالمؤمنین علیہالسلام میں زائرین کے لیے ضیافت افطار کا اہتمام کیا گیا ہے جس کے تحت حرم مقدس امیرالمؤمنین علیہالسلام کے شعبہ مہمان سرائے نے رمضان المبارک کے دوران زائرین کی میزبانی کے لیے ایک جامع اور منظم پروگرام کا آغاز کیا ہے۔
یہ پروگرام زائرین کے لیے روزانہ اور ہفتہ وار ضیافت افطار کے انعقاد کے ساتھ ساتھ نجف اشرف اور عراق کے دیگر صوبوں میں افطار کے دسترخوانوں کی تنظیم پر مشتمل ہے، جس سے معاشرے کے مختلف طبقات مستفید ہو رہے ہیں۔
حرم مقدس امیرالمؤمنین علیہالسلام کے شعبہ مہمان سرائے کے سربراہ اثیر التمیمی نے میڈیا سینٹر سے گفتگو کرتے ہوئے کہا کہ اس پروگرام پر حرم مقدس کے متولی کی براہ راست نگرانی اور ہدایت میں عمل درآمد کیا جا رہا ہے، اس کی پہلی ضیافت جمعہ کے روز حرم مقدس امیرالمؤمنین علیہالسلام کے جوار میں واقع صحن حضرت زہرا سلاماللہعلیہا میں انجام پائی۔
انہوں نے مزید کہا کہ حرم مقدس امیرالمؤمنین علیہالسلام کے زائرین کی میزبانی کے لیے ہر ہفتے ضیافت افطار کا اہتمام کیا جاتا ہے، اس کے علاوہ روزانہ افطار پروگرام بھی الیکٹرانک ریزرویشن سسٹم، مہمان سرائے کے کارڈ تقسیم کرنے والے مراکز، اور حرم مقدس کے اندر اور باہر تعینات موبائل ٹیموں کے ذریعے جاری ہے۔
اثیر التمیمی نے واضح کیا کہ رمضان المبارک کے افطار پروگرام میں بزرگوں کے نگہداشت مراکز، فلاحی ادارے، عراق کے مختلف صوبوں میں مستحق طبقات اور طلبا بھی شامل ہوں گے۔ یہ اقدامات رمضان المبارک کے دوران حرم مقدس امیرالمؤمنین علیہالسلام کی جانب سے جاری سماجی امدادی سرگرمیوں کا حصہ ہیں۔
انہوں نے مزید کہا کہ شعبہ مہمان سرائے اس پروگرام کے ساتھ ساتھ کمزور اور کم آمدنی والے خاندانوں میں کھانے کی تقسیم کا سلسلہ بھی جاری رکھے ہوئے ہے، جبکہ ہزاروں یتیموں اور مستحق افراد کی کفالت بھی رمضان المبارک کے مستقل پروگرام کے تحت انجام دی جا رہی ہے۔ یہ اقدامات حرم مقدس امیرالمؤمنین علیہالسلام کی سخاوت، سماجی ذمہ داری اور زائرین و معاشرے کی خدمت کے انسانی مشن کی واضح عکاسی کرتے ہیں۔
اس خبر کی تصویری جھلکیاں دیکھنے کے لیے یہاں کلک کریں
