حرم مقدس امیرالمؤمنینؑ نے عراق میں پہلی بار ایک ایسا جدید اور ہمہ گیر مواصلاتی منصوبہ شروع کیا ہے جو تمام مواصلاتی کمپنیوں کو ایک ہی مشترکہ نیٹ ورک کے تحت مربوط کرتا ہے۔ یہ نیٹ ورک صحن حضرت فاطمہ زہرا سلام اللہ علیہا کے تمام طبقات کو مکمل طور پر کور کرتا ہے اور زائرین کو خاص طور پر زیارتِ اربعین جیسے ایام میں اعلیٰ معیار کی انٹرنیٹ اور کال سروس فراہم کرتا ہے۔
افتتاحی تقریب اور قومی سطح کی شرکت
یہ انقلابی منصوبہ حرم مقدس امیرالمؤمنینؑ کے متولی جناب سید عیسی الخرسان، عراق کی وزیر مواصلات ڈاکٹر ہیام الیاسری، عراق کی مواصلاتی و میڈیا کمیٹی کے نمائندے، مختلف کمپنیوں کے سربراہان، سکیورٹی افسران، اور حرم مقدس امیرالمؤمنینؑ کے ذمہ داران و خادمین کی موجودگی میں ایک باضابطہ تقریب کے دوران افتتاح ہوا۔
مقدس شہروں کی خدمت کے لیے ڈیجیٹل پیشرفت
وزیر مواصلات ڈاکٹر ہیام الیاسری نے کہا کہ ہمیں فخر ہے کہ اس منصوبے کا آغاز نجف اشرف سے ہوا، کیونکہ یہ عراق میں مواصلاتی خدمات کی تاریخ میں ایک بڑا قدم ہے، خاص طور پر ایسے مواقع پر جب لاکھوں زائرین مقدس آستانوں کا رخ کرتے ہیں۔
انہوں نے مزید کہا کہ وزارت نے مواصلاتی کمپنیوں کے تعاون سے زیارتی ایام میں شہریوں کو تیز رفتار اور سستے انٹرنیٹ کی فراہمی کے لیے بنیادی ڈھانچے کی فراہمی پر کام کیا ہے۔
پانچ طبقوں پر مشتمل جدید اور ڈیجیٹل نیٹ ورک
پراجیکٹ کے فنی نگران اور حرم مقدس امیرالمؤمنینؑ کے خادم، انجینئر کرار نجار نے بتایا کہ اس منصوبے پر دو سال قبل کام شروع ہوا، جس میں میڈیا و مواصلاتی ادارے کی براہِ راست نگرانی شامل تھی، اور عراق کی تمام معروف ٹیلی کام کمپنیوں کے ساتھ مکمل ہم آہنگی سے اسے پایۂ تکمیل تک پہنچایا گیا۔”
انہوں نے وضاحت کی کہ صحن حضرت فاطمہ زہراؑ کے تمام طبقات زیرزمین سے لے کر بالائی حصوں تک میں 350 سے زائد کنکشن پوائنٹس نصب کیے گئے ہیں، جن کی گہرائی 14 میٹر اور مختلف اونچائیوں تک جاتی ہے، یہ سسٹم بیک وقت 100000 سے زائد صارفین کو بغیر کسی تعطل کے سروس فراہم کر سکتا ہے۔
270000 مربع میٹر پر محیط مواصلاتی کوریج
فراتِ اوسط ریجن میں میڈیا و مواصلات کمیٹی کے ڈائریکٹر، انجینئر عباس خاقانی نے کہا کہ یہ عراق کا پہلا منصوبہ ہے جس میں اس سطح پر انجینئرنگ، الیکٹرانک ڈیزائن، اور زمینی نگرانی کے ساتھ کام کیا گیا ہے، 350 سے زائد مواصلاتی اینٹینے نصب کیے گئے ہیں جو 270000 مربع میٹر پر پھیلے پانچ طبقات کو کور کرتے ہیں۔
انہوں نے مزید کہا کہ اس منصوبے کے تحت صحن حضرت فاطمہ، خدماتی مقامات، دفاتر، کتب خانہ، عبادت گاہیں اور کانفرنس ہالز میں بھی بہترین مقامات پر جدید مواصلاتی آلات کی تنصیب عمل میں لائی گئی ہے۔
آستان مقدس علوی کی جانب سے صحن حضرت فاطمہ زہرا سلام اللہ علیہا میں شروع کیا گیا یہ جدید مواصلاتی نظام، اربعین جیسے عظیم الشان مواقع پر زائرین کو تیز، محفوظ اور مربوط خدمات فراہم کرنے کے لیے ایک عملی نمونہ ہے۔ یہ نظام نہ صرف زیارت کو آسان اور مؤثر بناتا ہے بلکہ مقدس شہروں کی ترقی میں جدید ٹیکنالوجی کے کردار کو بھی نمایاں کرتا ہے۔
