حرم مقدس امیرالمومنین علیہ السلام کی جانب سے، صحن مقدس علوی کو دنیا کے بہترین اور شاندار فرشوں سے مزین کیا گیا ہے۔
حرم مقدس امیرالمومنین علیہ السلام کے نیوز سنٹر کی رپورٹ کے مطابق، ماہ مبارک رمضان کے استقبال کی تیاریوں کے سلسلے میں، حرم مقدس امیرالمومنین علیہ السلام نے وسیع خدمات کا سلسلہ شروع کیاہے، جس میں سب سے اہم اقدام حرم مطہر کے صحن کو چھ ہزار پانچ سو مربع میٹر سے زائد رقبے میں نئے فرشوں سے مزین کرنا ہے؛ یہ اقدام اس نیت سے کیا گیا ہے تاکہ حرم مقدس امیرالمومنین علیہ السلام کے زائرین کےلیے ایک روحانی اور عبادی ماحول مہیا کیا جا سکے جس میں وہ ماہ مبارک میں عبادت انجام دے سکیں۔
حرم مقدس امیرالمومنین علیہ السلام کے بورڈ آف ممبرز کے رکن حیدر العیساوی نے نیوز سنٹر سے گفتگو کرتے ہوئے کہا: حرم مقدس کے کارکنان ایک جامع منصوبے کے تحت صحن کی فرش کاری کا آغاز کر چکے ہیں؛ اس منصوبے کا آغاز اس لئے کیا گیا ہے تاکہ ماہ مبارک رمضان میں زائرین کے لئے بہترین روحانی اور عبادی ماحول فراہم کیا جا سکے۔
العیساوی نے مزید کہا: نئے فرش نفیس نباتاتی نقش و نگار اور منفرد ڈیزائن سے مزین ہیں اور ان کی تیاری میں اعلیٰ معیار کے عالمی ریشوں اور معتبر بین الاقوامی معیاروں کا استعمال کیا گیا ہے؛ تاکہ اس مقدس مقام کا تقدس برقرار رہے۔
انہوں نے وضاحت کرتے ہوئے کہا کہ فرش کاری کا رقبہ چھ ہزار پانچ سو مربع میٹر سے زیادہ ہے اور اس میں صحن شریف کے رواق، صحن حرم مطہر اور صحن کے داخلی دروازوں کو بھی شامل کیا گیا ہے تاکہ زائرین کو حرم مقدس کے اندر زیادہ سے زیادہ آرام و سکون فراہم کیا جا سکے۔
العیساوی نے مزید کہا کہ یہ فرش مختلف سائز میں تیار کیے گئے ہیں اور استعمال ہونے والے فرشوں کی تعداد تقریباً تین ہزار ٹکڑوں تک پہنچتی ہے۔ انہوں نے وضاحت کی کہ یہ اقدامات حرم مقدس امیرالمومنین علیہ السلام کی جانب سے اس لئے انجام دیئے جا رہے ہیں تاکہ زائرین کے لئے بہترین خدمات انجام دی جا سکیں۔
