حرم مقدس امیرالمؤمنین علیہالسلام کے زیر انتظام صنعتی منصوبہ "القسیم” فلور مل عراق میں غذائی سلامتی کے تحفظ کے لیے ایک اہم اور اسٹریٹجک کردار ادا کر رہی ہے۔
"فیض القسیم” کمپنی سے وابستہ یہ فیکٹری عراقی وزارتِ تجارت کے تعاون سے قومی "کارتِ تموینیہ” نظام کے تحت اعلیٰ معیار کا آٹا فراہم کرتی ہے، ماہرین نے بھی اس مل کے تیار کردہ آٹے کو ملک میں دستیاب بہترین مصنوعات میں شمار کیا ہے۔
فیکٹری کے ڈائریکٹر سلام الجابری نے بتایا کہ القسیم فلور مل حرم کے نمایاں ترین منصوبوں میں سے ایک ہے، جس کی یومیہ پیداواری صلاحیت 200 ٹن تک ہے، یہ جدید الیکٹرانک نظام پر مبنی چھ منزلہ پلانٹ ہے جو ماہر انجینئرز اور فنی عملے کی نگرانی میں کام کرتا ہے، یہاں نہ صرف آٹا بلکہ اعلیٰ معیار کا سبوس (Bran) بھی تیار کیا جاتا ہے، جو انسانی خوراک اور جانوروں کے چارے دونوں کے لیے ایک بنیادی ذریعہ ہے۔
فیکٹری کے پروڈکشن مینیجر انجینئر حسین شربہ نے وضاحت کی کہ عمل کا آغاز سرکاری ڈپو سے گندم وصول کرنے کے بعد ہوتا ہے، اس کے بعد صاف کرنے اور ناخالصیاں دور کرنے کے دقیق مراحل مکمل کیے جاتے ہیں، پھر نمی دینے اور آٹا تیار کرنے کا مرحلہ آتا ہے، جس کے بعد جدید مشینری کے ذریعے مسلسل ملنگ کا عمل انجام پاتا ہے۔
آخر میں تیار شدہ آٹا خصوصی سیلوز میں ذخیرہ کیا جاتا ہے اور پھر فیکٹری کی اپنی گاڑیوں کے ذریعے نجف اشرف اور گرد و نواح میں تقسیم مراکز تک پہنچایا جاتا ہے۔
واضح رہے کہ القسیم فلور مل حرم مقدس امیرالمؤمنین علیہالسلام کے اُن بڑے پیداواری و خدماتی منصوبوں میں سے ہے جو براہِ راست سماجی خدمت اور عوامی ضرورتوں کی تکمیل سے جُڑے ہیں۔
یہ فیکٹری نہ صرف اعلیٰ معیار کی بنیادی غذائی اشیاء فراہم کر کے غذائی سلامتی کو مضبوط کرتی ہے بلکہ "کارتِ تموینیہ” نظام کے ذریعے ضرورت مند خاندانوں تک امانتداری سے اشیاء پہنچانے میں بھی اہم کردار ادا کر رہی ہے۔
