حرم مقدس امیرالمؤمنین علیہالسلام نے اپنے اسٹریٹجک پروگرام کے تحت عراق کی مختلف یونیورسٹیوں اور تعلیمی مراکز کے ساتھ تعاون کو وسعت دینے کے لیے ایک نیا قدم اٹھایا ہے۔
حرم مقدس امیرالمؤمنین علیہالسلام کے زیر انتظام ’’نَظم’’ یونٹ نے اپنے اسٹریٹجک پروگرام کے تحت بغداد کی متعدد یونیورسٹیوں اور علمی مراکز کا دورہ کیا۔
"نَظم” یونٹ کے سربراہ وسام اسکندر نے میڈیا سنٹر کو بتایا کہ ہمیں یقین ہے کہ حقیقی ترقی معتبر یونیورسٹیوں کے ساتھ تعاون سے شروع ہوتی ہے، اسی بنیاد پر ہمارے وفد نے بغداد یونیورسٹی، مستنصریہ یونیورسٹی اور یونیورسٹی آف ٹیکنالوجی جیسے تعلیمی مراکز کا دورہ کیا۔
انہوں نے مزید کہا کہ یہ دورے محض ملاقات کے لیے نہیں تھے بلکہ فریقین کے مابین تبادلہ خیال اور مشترکہ تعاون کے راستے تلاش کرنے کا ایک عملی موقع فراہم کرنے والے تھے، گفتگو میں مشاورت، منصوبہ بندی اور تعلیمی ترقی جیسے پہلوؤں پر خصوصی توجہ دی گئی تاکہ پیشہ ورانہ مہارتوں کو فروغ دیا جا سکے اور تعلیم کے میدان میں نئے مواقع پیدا کیے جا سکیں۔
"نَظم”یونٹ کے نمائندے احمد بغدادی نے مزید وضاحت کی کہ ہمارا وفد نہ صرف مذکورہ یونیورسٹیوں بلکہ قومی مرکز برائے صحت و سلامتی اور علاقائی مرکز برائے ایمرجنسی میڈیسن بھی گیا، جہاں مختلف ماہرین اور اداروں کے ذمہ داران کے ساتھ مثبت اور نتیجہ خیز بات چیت ہوئی، جس سے یہ واضح ہوا کہ سب مل کر جدید ترین طریقہ کار کی بنیاد پر تعلیمی و علمی ترقی کو آگے بڑھانے کے لیے پرعزم ہیں۔
انہوں نے اس بات پر زور دیا کہ یہ دورے محض سرگرمیاں نہیں بلکہ عملی اقدامات ہیں، جن کا مقصد حرم مقدس امیرالمؤمنین علیہالسلام اور ملک کی یونیورسٹیوں کے درمیان تعلیمی و علمی ہم آہنگی کو فروغ دینا ہے، یہ شراکت داری پیشہ ورانہ صلاحیتوں میں اضافہ اور تعلیمی و ترقیاتی شعبوں میں کارکردگی کو بہتر بنانے کے ہدف کے ساتھ آگے بڑھائی جا رہی ہے۔
- ایمرجنسی میڈیسن، بغداد یونیورسٹی، تعلیمی مراکز، حرم مقدس امیرالمؤمنین علیہالسلام، صحت و سلامتی ، عراق، علمی تعاون، مرکز نَظم، مستنصریہ یونیورسٹی، یونیورسٹی آف ٹیکنالوجی، یونیورسٹیاں
