حرم مقدس امیرالمؤمنین علیہالسلام کے شعبہ امور فکری و ثقافتی نے بغداد میں منعقد ہونے والے بین الاقوامی کتاب میلے کے دوران اپنی انواع اقسام کی ثقافتی سرگرمیوں کے تحت مختلف جدید فنون کے موضوعات پر خصوصی تعلیمی ورکشاپس کا اہتمام کیا۔
حرم مقدس کے شعبہ امور فکری و ثقافتی کے سربراہ کرار الحلو نے خبری مرکز سے گفتگو کرتے ہوئے کہا کہ ہم نے اپنے منصوبۂ تخصصی کے تحت کتاب میلہ میں حرم کے اسٹال کے افتتاح کے ساتھ ہی متعدد فکری، ثقافتی اور فنون سے متعلق ورکشاپس کا آغاز کیا، جو اس شعبے کے ذیلی یونٹس کی جانب سے پیش کیے گئے۔
یہ سلسلہ تین متواتر ورکشاپس پر مشتمل تھا، جو بالترتیب کتاب کی طباعت سے متعلق جدید طریقوں پر مرکوز تھیں۔ پہلی ورکشاپ کا موضوع "خط کوفی مصحفی” تھا، جسے خطاط حسین کوفی نے پیش کیا، اس ورکشاپ میں خط کوفی مصحفی کی تاریخ و ارتقا، حروف کی ساخت اور کلمات کی تشکیل پر گفتگو کی گئی، ساتھ ہی منتخب نمونوں پر عملی مشق بھی کروائی گئی۔
دوسری ورکشاپ "قدرتی دستساز کاغذ” کے فن سے متعلق تھی، جسے احمد موسوی نے پیش کیا۔ اس نشست میں شرکاء کو خام مواد اور اس کی تیاری کے مراحل، کاغذ سازی کے بنیادی آلات، اسلامی کاغذ کی اقسام اور اسلامی و یورپی کاغذ کے درمیان آبی نشانات کے فرق سے روشناس کرایا گیا۔
تیسری ورکشاپ کا موضوع "تھری ڈی پرنٹنگ” تھا، جسے انجینئر سجاد خالد مهدی نے پیش کیا۔ اس ورکشاپ میں جدید ٹیکنالوجی کا تعارف، مختلف تھری ڈی پرنٹرز کی وضاحت، ڈیزائن سے لے کر عمل درآمد تک مراحل کی تفصیل اور طباعت کے بعد کے اقدامات پر روشنی ڈالی گئی۔
قابل ذکر ہے کہ حرم مقدس امیرالمؤمنین علیہالسلام بین الاقوامی کتاب میلہ بغداد 2025 میں نمایاں اسٹال کے ساتھ بھرپور انداز میں شریک ہوا۔ اس موقع پر شعبہ امور فکری و ثقافتی کے علاوہ میڈیا، انفارمیشن ٹیکنالوجی، روابط عامہ، انجینئرنگ اور فنی شعبہ جات سمیت دیگر معاون یونٹس نے بھی فعال شرکت کی۔
