اربعین زائرین کے لیے علوی مہمان نوازی
حرم مقدس اميرالمومنين عليہ السلام نے اربعین کے ایام میں وسیع اور منفرد خدمات فراہم کرتے ہوئے لاکھوں زائرینِ امام حسین (علیہ السلام) کی میزبانی کا شرف حاصل کیا۔
لاکھوں زائرین کی میزبانی
اعداد و شمار کے مطابق، ماہِ صفر کے پہلے دن سے بیسویں صفر تک ایک کروڑ ۷۴ لاکھ ٦٣ ہزار ۱۱ زائرین نے حضرت امیرالمومنین امام علی (علیہ السلام) کے روضۂ مبارک کی زیارت کا شرف حاصل کیا۔
پینے کے صاف پانی کی فراہمی
اربعین کے دوران ۷ کروڑ لیٹر صاف اور فلٹر شدہ پینے کا پانی زائرین میں تقسیم کیا گیا، جبکہ ۱ کروڑ ۳۰ لاکھ سے زائد گلاس پانی بھی فراہم کیے گئے۔
علوی ضیافت
حرم مقدس اميرالمومنين عليہ السلام کے ۱۶ ضیافتی مراکز کے ذریعے مجموعی طور پر ۷۵ لاکھ کھانے زائرین میں تقسیم کیے گئے۔
زائرین کے قیام کا انتظام
اربعین زائرین کی سہولت کے لیے وسیع پیمانے پر رہائش کے انتظامات کیے گئے، جن میں:
– صحنِ حضرت فاطمہ زہرا (سلام اللہ علیہا) میں ۴ بڑے ہال کھولے گئے۔
– حرم کے اطراف اور شہرِ امام رضا (علیہ السلام) میں ۴ آرام گاہیں تیار کی گئیں۔
– ۴۹ ہزار مربع میٹر رقبے پر سایہ دار مقامات فراہم کیے گئے۔
فنی اور ٹیکنالوجی خدمات
زائرین کی حفاظت کے لیے ۵ ہزار سے زائد سی سی ٹی وی کیمرے نصب کیے گئے۔ متعدد زبانوں میں رہنمائی کے بورڈ نصب کیے گئے، جبکہ ۱۳ ہزار ۵۰۰ زائرین کو مفت انٹرنیٹ کی سہولت بھی فراہم کی گئی۔
دینی اور ثقافتی خدمات
۲۱ شرعی رہنمائی مراکز قائم کیے گئے، جہاں حوزۂ علمیہ کے اساتذہ زائرین کے شرعی سوالات کے جوابات دیتے رہے۔ اس کے علاوہ عراق کے مختلف صوبوں میں ۲۵۰ قرآنی مراکز قائم کیے گئے، جہاں ایک ہزار سے زائد اساتذۂ قرآن نے خدمات انجام دیں۔
رضاکار خدام کی خدمات
اربعین کے دوران ۱۰ ہزار ۲۱۴ سے زائد رضاکار خدام نے اپنی صلاحیتوں کے مطابق مختلف شعبوں میں خدمات انجام دیں اور زائرین کی خدمت کو اپنا اعزاز بنایا۔
ثقافتی اور تربیتی سرگرمیاں
مرکزِ محسن برائے ثقافتِ اطفال نے بچوں کے لیے ثقافتی، تربیتی اور تفریحی پروگرام منعقد کیے، جبکہ تصویری نمائشوں کے ذریعے واقعۂ عاشورا اور حسینی ثقافت کو مؤثر انداز میں پیش کیا گیا۔
گمشدہ زائرین کی رہنمائی
۵ مراکز برائے رہنمائیِ گمشدگان قائم کیے گئے، جن کی مدد سے ۲۱ ہزار ۸۰۰ زائرین کو ان کے اہلِ خانہ سے دوبارہ ملایا گیا۔
طبی خدمات
اربعین کے دوران ۵ طبی مراکز قائم کیے گئے، جہاں نجف محکمۂ صحت کے تعاون سے ۳۹۲ مرد و خواتین طبی و امدادی اہلکاروں نے زائرین کو علاج اور طبی امداد فراہم کی۔
نقل و حمل کی سہولیات
حرم مقدس اميرالمومنين عليہ السلام نے ۴۷۰ گاڑیوں پر مشتمل اپنے ٹرانسپورٹ نظام کو زائرین کی خدمت کے لیے وقف کیا، تاکہ ان کی آمدورفت کو آسان، محفوظ اور منظم بنایا جا سکے۔
